Правилник за доделување на наградата „Климентова повелбa"

                    Наградата "Климентова повелба" е востановена во 1999 год.
                   Се доделува на секои две години на изборните собранија на БДМ за исклучителни резултати во развојот на библиотекарството во Република Македонија, објавени научни и стручни трудови од базично значење за него, за особен придонес во едукацијата и промоцијата на библиотекарите и библиотеките како и за ефекти во остварувањето целите на БДМ.
                    Наградата се состои од Повелба и вредносен дел.

 I
ОПШТИ ОДРЕДБИ

Член 1

                     Со овој Правилник се регулираат условите и постапката за доделување на наградата "Климентова повелба" на Библиотекарското друштво на Македонија.
                     Наградата се доделува на библиотекари од сите видови библиотеки во Република Македонија, како и почесни членови (во натамошниот текст Награда).

Член 2

                     Наградата се доделува за постигнати особени резултати од пошироко значење за развојот и афирмацијата на библиотечната дејност во Републиката.

Член 3

                    Наградата се состои од Повелба и вредносен износ. Висината на вредносниот дел на Наградата го утврдува Извршниот одбор на Друштвото.

Член 4

                    Наградата се доделува на секои 2 години на редовно Годишно Собрание на Друштвото.

Член 5

                    Постапката за доделување на наградата "Климентова повелба" ја спроведува посебна комисија составена од пет члена.
                    За членови на Комисијата се предлагаат афирмирани библиотекари од сите видови библиотеки во Републиката, редовни членови на Друштвото. Членовите од своите редови избираат Претседател на Комисијата.

Член 6

                    Мандатот на членовите на Комисијата е две (2) години. За член на Комисијата едно лице може да биде избрано најмногу двапати едноподруго.

Член 7

                    Комисијата врз основа на овој Правилник распишува Конкурс во кој ги определува поблиските услови за учество на Конкурсот.

Член 8

                    Комисијата врз основа на пристигнатите писмени предлози подготвува Предлог на можен кандидат за доделување на наградата "Климентова повелба". Предлогот во писмена форма со образложение го доставува до извршниот одбор (ИО) на Друштвото.
                    Врз основа на предлогот од Комисијата ИО на Друштвото донесува Одлука за доделување на Наградата.

Член 9

                    Доколку учесниците на Конкурсот не ги исполнуваат условите од овој Правилник, Комисијата може да одлучи да не ја додели наградата за односната година.

Член 10

                    Одлуката на ИО за доделување на Наградата и Повелбата ги потпишува Претседателот на Извршниот одбор.

II
ОБЈАВУВАЊЕ КОНКУРС И УСЛОВИ ЗА КОНКУРИРАЊЕ

Член 11

                    Комисијата за доделување на Наградата врз основа на овој Правилник подготвува Конкурс со поблиски пропозиции за учество на заинтересираните кандидати. ИО ги утврдува конкурсните услови и ги објавува во библиотекарските информативни гласила; дневниот печат, а може да се користат и други соодветни форми за информирање.

Член 12

                    Право на предлагање кандидати за наградата "Климентова повелба" имаат: библиотеките; Заедницата на народни библиотеки; членовите на БДМ и други сродни институции и организации.

Член 13

                    За секој кандидат, учесник на Конкурсот покрај пријавата треба да се достави и:

-                                       1. Кратка биографија;
                                         2 .Преглед на професионалниот ангажман;
                                         3. Список на објавени стручни трудови;
                                         4. Писмени препораки од најмалку два Виши библиотекари или Библиотекарски                                              советници.

Член 14

                    Образложените предлози во затворен плик се доставуваат до Комисијата за доделување на наградата во утврден рок со конкурсните услови. Предлозите кои ќе пристигнат по истекот на предвидениот рок и некомплетните предлози нема да бидат разгледувани, и ќе им бидат вратени на кандидатите.

Член 15

                    Работата на Комисијата е јавна. Заинтересираните кандидати имаат право на увид на сите документи кои се приложени на Конкурсот.

Член 16

                    Учесниците на Конкурсот доколку имаат забелешки на работата на Комисијата и се незадоволни од нејзините одлуки, во писмена форма треба да достават Приговор до ИО на Друштвото. Приговорите се доставуваат во рок од осум (8) дена од доставувањето на Одлуката.

III
ДОНЕСУВАЊЕ ОДЛУКА ЗА ДОДЕЛУВАЊЕ НА НАГРАДАТА

Член 17

                    Комисијата во полн состав ги разгледува пристигнатите пријави и изготвува Предлог. Предлогот за добитник на Наградата го доставува до ИО на Друштвото. ИО врз основа на Предлогот од Комисијата донесува Одлука за доделување на наградата.
                    Одлуката се донесува со мнозинство гласови од вкупниот број членови на ИО и е полноважна доколку гласале повеќе од половината членови на ИО.

Член 18

                    Доколку член на Комисијата или ИО е кандидат и учесник на Конкурсот за наградата "Климентова повелба" во тој случај тој се иззема од работата на овие тела при нивното одлучување. На негово место ИО на БДМ кооптира нов член.

Член 19

                    Одлуката на ИО за добитникот на Наградата се објавува во библиотекарските информативни гласила, дневниот печат и други информативни медиуми.

Член 20

                    Наградата "Климентова повелба" ја врачува Претседателот на Друштвото на редовното годишно Собрание.

Член 21

                    "Климентовата повелба" може да биде доделена и на почесни членови на Друштвото и други заслужни граѓани кои оствариле значаен придонес во афирмацијата на библиотечната дејност или на друг начин придонеле за нејзино општествено етаблирање.

Член 22

                    Повелбата доделена според Член 21 од Правилникот не содржи вредносен дел.

IV
ПРЕОДНИ И ЗАВРШНИ ОДРЕДБИ

Член 23

                    Постапката за измени и дополнување на овој Правилник е иста како и при неговото донесување.

Член 24

                    Правилник за доделување на наградата "Климентова повелба" е донесен на редовно Годишно Собрание на Библиотекарското друштво на Македонија, одржано во Скопје на 4 и 5 јуни 1998 година.

другo...